“MONGOLIAN DAYS-2022” АРГА ХЭМЖЭЭНИЙ НЭЭЛТЭД ЖДҮГ-ЫН ДАРГА Я.ЭРДЭНЭСАЙХАН ОРОЛЦЛОО

2022-09-01 56 0

“Монголын худалдаа, хөрөнгө оруулалт, өв соёлын чуулган – 2022” сэдвийн хүрээнд зохион байгуулагдаж буй “Монголын өдрүүд – 2022” арга хэмжээний нээлт Вашингтон Ди Си хотын Роналд Рейганы Олон улсын худалдааны төвд боллоо.

Уг арга хэмжээ нь АНУ, Монгол Улсын хоорондын худалдаа, эдийн засгийн хамтын ажиллагааг өргөжүүлэх, бизнес эрхлэгчдийг гадаад зах зээлтэй холбож, хөрөнгө оруулагчдыг татах, үндэсний үйлдвэрлэгчдийн бараа бүтээгдэхүүн болон Монгол орны өв соёлыг сурталчлан таниулах зорилготой юм.

Арга хэмжээг Жижиг, дунд үйлдвэрийн газрын дарга Я.Эрдэнэсайхан, Монгол Улсаас АНУ-д суугаа ЭСЯ-ны Хэргийг түр хамаарагч, Элчин зөвлөх Я.Болд-Эрдэнэ, АНУ-ын ХХААЯ-ны ахлах зөвлөх Ж. Вэйд Шеффард, Дэлхийн банкны орон хариуцсан ахлах ажилтан Лианг Ванг нар тус тус үг хэлэв.

Монголын өдрүүд-2022” арга хэмжээг

Монгол Улсын Хүнс, хөдөө аж ахуй, хөнгөн үйлдвэрийн яам, Жижиг, дунд үйлдвэрийн газар/SME Agency of Mongolia

-Эдийн засгийн хөгжлийн яам,

– Монголын Үндэсний Худалдаа, Аж Үйлдвэрийн Танхим,

-“Экспорт Монголиа” төрийн бус байгууллага,

– Монгол Улсын ЭСЯ болон Монголын ноос, ноолуур, арьс шир, оёдол, гар урлал, гоо сайхан, хүнсний үйлдвэрлэл эрхлэгч 50 гаруй компанийн бизнес эрхлэгчид, соёл урлагийн салбарын төлөөлөл зэрэг нийт 80 гаруй хүн оролцож байна.

Эхний өдрийн байдлаар Үзэсгэлэнгийн танхимаар 400 орчим хүн зочилсон байна.

“Монголын өдрүүд-2022” арга хэмжээнд Төрийн департамент, Худалдааны танхим, Дэлхийн банк зэрэг АНУ-ын төр захиргааны байгууллагуудын албан тушаалтнууд урилгаар оролцож байна.

Тус арга хэмжээний үеэр Монголын үндэсний үйлдвэрлэгчдийн үзэсгэлэн худалдаа, өв соёлоо таниулах урлаг, соёлын үзүүлбэр, уран зургийн үзэсгэлэнг олон нийтэд дэлгэн үзүүлэхээс гадна хоёр орны худалдаа, хөрөнгө оруулалтын салбарт хамтын ажиллагааг өргөжүүлэх хүрээнд бизнес уулзалтууд зохион байгуулагдах юм.

Холбоотой мэдээ