“ТӨРДӨӨ ЭЭЛТЭЙ ОРОН НУТАГ” АЯН ЭХЭЛЛЭЭ

2022-03-25 220 0

“Төрдөө ээлтэй орон нутаг” аяныг аймгийн Прокурорын газар, аймгийн Засаг даргын тамгын газар хамтран 3 сарын 22-ны өдрөөс 5 сарын 30-ны өдрийг хүртэл зохион байгуулна.

Хоршооны тухай хуулийн дагуу Сум хөгжүүлэх санг Хоршоо хөгжүүлэх сан болгон өөрчилсөнтэй холбогдуулан “Хоршоо хөгжүүлэх сан”-д санхүүжилт төвлөрүүлэх, хуулийн эрх зүйн орчинг таниулах, мөн сум хөгжүүлэх сангаас зээл аваад эргэн төлөөгүй иргэн, аж ахуй нэгжийн зөрчилтэй зээлийг төлүүлэх зорилгоор энэхүү аяныг санаачилжээ.

Өнөөдөр /3 сарын 22/ аймгийн Засаг дарга М.Батжаргал, аймгийн Прокурорын газрын ерөнхий прокурор, хууль цаазын шадар зөвлөх Б.Ганбаатар нар сумдын Засаг дарга нартай цахим уулзалт хийж аяны зорилго, мэдээллийг хүргэлээ.

Нийгэмд шудрага ёсыг тогтоож, аливаа төсөл, хөтөлбөрийн санхүүжилтийг танил тал, ашиг сонирхлын зөрчилгүйгээр хүргэх ёстой эзэнд нь хуваарилахад энэхүү аян чухал ач холбогдолтойг Засаг даргаас илэрхийлж байлаа.

Аяны хүрээнд сум тус бүр “Сум хөгжүүлэх сан” –тай холбоотой бичиг баримт, олгосон зээл, эргэн төлөгдөөгүй зээлийн талаарх мэдээллийг нэгтгэнэ.

Прокурорын газар, аймгийн Засаг даргын тамгын газраас хамтарсан ажлын хэсэг сумдад очиж:

– Буруутай этгээдээс хохирол гаргуулах тухай нэхэмжлэлийг шүүхэд болон эвлэрүүлэн зуучлагчид гаргах эсэх асуудлыг шийдвэрлэх

– Зээлийн төлөлттэй холбоотой эвлэрүүлэн зуучлалд гаргасан нэхэмжлэлүүд эвлэрлийн гэрээг баталгаажуулж шүүхээс хэрэгсэхгүй болгож шийдвэрлэсэн боловч төлөгдөөгүй байдлын судалгааг гаргах

– Шүүхийн шийдвэр гүйцэтгэх байгууллагад хандаж хохирлыг нөхөн төлүүлэх зэрэг арга хэмжээ авах юм.

Эх сурвалж: Архангай аймгийн ЗДТГ

Холбоотой мэдээ